Chinmi nih kan tuah bal lomi avoi khatnak Chin Idol 2012 thimnak cu Chin Foundation (CF) hruainak in
Indianapolis, Indiana, USA ah November 24th 2012 ahkhan hlunghlai ngai in tuah asi. Hi thimnak ah pakhatnak a hmumi hi Zo Sang Puii, Southport high school, Indiana, ah a kai liomi asi. Pa hnihnak a hmumi hi Tial Sui Rem, North Carolina state ah high school a kai liomi asi ve. Hi hna pahnih hi aa zuammi tampi chungin minung 10 an thim hna hnuah cu pahra chung cun a hlei in thimmi an si.
Chin Idol hi a peh te in tuah khawh lengmang sisehlaw US ummi lawng si loin vulei cung Chinmi vialte huapin tuah khawh si te sehlaw tiah saduhthahnak rak ngeih a si. Hmailei ah cu chunmang cu kan sining zoh in pehzulh khawh kan izuam te lai. Chin Idol kan tuah duh channak cheu khat hna cu;
- Kan fanau le hna hla le music leiah an thancho khawh deuhnak hnga
- Kan khrihfa zatlang nun kan cawisannak hnga (Chin le Khrihfa, Khrihfa le Hla, Chin-Khrihfa-Hla)
- Holh phunkip in phuahmi kan sakti nak thawngin lungrualnak kan ngeih deuh khawhnak hnga
- Hla cawisan cu bia cawisan asi (ca le bia zongin kan rum deuhlai)
- Hla hi kan miphun pahrang bantuk asi caah kan cawisan a hau
- Chin Idol hi kan miphun caah phuntungtu pakhat bantuk si diangah saduhthah asi
