Comments Off on LA Cazual

LA Cazual

Capture

LA Cazual 1
(Summer School 2016 lio chuahmi asi)
June 16, 2016

Dawtmi Nule Pa hna,

Tuchun cun Summer School zarh khatnak kan ilim. Ahmasa bikah nule pa cungah lawmhnak kan chim. Zei tluk in dah nan fale caah nan izuam ti zong fiang te in kan hmuh tikah kan in upat ngaingai hna. Nule pa felfai pipi a lomi nakin ruah lo deuhmi tete nih fale caah nan ipekmi kan hmuh tikah Bawipa nih thluahuah a pek hna lai I nikhat khat cu bochan tlak taktak tefa nan ingeih te ko hna lai, ti zong zumhnak kan ngei ko. Mahti te hin Lailei zongah zumhmi pipi chungkhar sin si lem lo in retheimi hna chungkhar in fa thatha le cathiam sangsang an chuah tawn nak hi asi. Kan van a that khunnak cu vulei cung fimcawnnak ah a that biknak America ah kan fale fimnak an cawn mi hi asi.

America cu ram thangcho asi bantuk in kan fale hi thil thalo nih fawi tukin a luhhnawh khawh hna, lam pial a fawi chinchin fawn, hawi thalo an tam, hrawktu a tham chinchin ve. Vulei cung fimcawnnak tha bikah cawng hna hmanhsehlaw kilven, hrithruai, thazang pek, cawnpiak pitu saza hawi kawl, hawi kom tha kawlpiak le thlacampiak cu an hau peng ko rih. Cu caah nule pa nan ibiatak bantuk in kanmah lei zong kan ibiatak ngaingai ve. A nikhatnak ni hna cu chuncaw hmanh kan ei manh ve lo. Kan ttangtti lai I theitha kan chuahpi te ko lai.

Atu kan tuahmi bantuk hi a tuahmi an um len ve. Kan idan ngaimi pakhat cu kaiman lakmi $400 an lak lioah $120 lawng kan lakmi hi asi. Sianghngakchia pakhat nih nikhatah $10 liam ding lawng nih a kiah hna. Mah cucu chuncaw eiman tluk hrawng lawng khi asi.

Umkalnak kongah lak hau mi kan tam pah caah nikhatnak cu kan buai ngaingai. Nan kan theihthiam caah kan ilawm. Tuhnu zong thlah le don kong hi kan buai pah lengmang rih ko men lai. Thlah le don manah $30 thawhmi nih a zat te ko rua lai tiah kan ruat nain motor hlanman le datsi (gas) man hmanh a zat deuh lo. Motor khaltu nihlawh cu bat a hau rih ko lai hih, a cawh cu kan in cawh ti hna lai lo.

Chim duhmi cu $30 kha cu det khawh asi ti lai lo, tinak asi. Kaiman $120 kha a pe rih lomi nih hmaizarh June 21 kai than tikah pek khawh rak izuam te u. Unau 3 a kaimi nan um ahcun a pathumnak kha cu a cheu lawng a liam lai, kaiman $360 si loin $300 lawng asi lai.

Hmailei kan fanau le thanchonak, Pathian an theihnak ding ca le kan miphun caah santlai an si tenak ding caah kitsih in tuan izuam ko hna usih!

><><><><><><><><>

LA Zacual 2
(Summer School 2016 lio chuahmi asi)
(06/22/2016)

Upatmi Nule Pa hna,

Summer School zarhhnihnak kan phan I a dih colh than. A ruang cu cawn nili ni khi kan hmanmi biakinn a lawn lo ruangah asi. Nili ni kan kai lo can-ai ah hmailei ah kai khawh kan izuam te lai. Zei tik asi ding tu kan chim kho deuh rih lo, kan in thanh than te hna lai.

Naizarh ah Suisui pa he bia kan iruah. Summer School nan tuahmi cu a tha tuk, atu bantuk in summer kan fale zohkhenh an herh ning le kan zohkhenh khawh hna lo lio te I nan tuahmi hrimhrim hi nan thiam tuk. Rangoon zongah titoih-puai lio hrawng ahcun khrihfabu nih mino hna hi Kawlpuai ah an va kal peng lai I an tlau thai sual lai, ti phan ah crusade le cawlcanghnak tete hna atu nan tuah bantuk hin an tuah theu. Cu ca ahcun atu nan tuahmi hi miphun kilven bak asi, kan fale tlau lonak ding kilven bak asi ko, tiah a chim. Khua na va ruat kho ngai ve tak aw, kan hei ti.

Kan thanh pah bangin hngakchia hi nichiar in an hmuhmi in siseh, an theihmi le an tonmi in an cawng peng. Cawn a thawng taktak mi an si. Thiltha kan cawnter hna lo ahcun an hmuh-theih mi thil thalo an cawng ko lai. Cu caah tha tein thithruai an hau. Laitlang ahcun lohtlau duh zongah a lam a um set lo, US ahcun a lam a tam tuk. Games tuahnak a sertu vialte hna nih zei tin dah an thluak an lak hna lai I kanmah games lawng an zoh duh lai, tiah a phunphun in an izuam. Cu caah raw lei hmanh thei ti lo tiangin an lem khawh hna.

Fale ca ahcun a kapkip in tanti kan hau. Nule pa lawng zong in a zat lo, innpa he, chungkhat he, khrihfabu he, saza te he, Life AcadeMe (Chin Foundation) he tiah kan zapi in kan tanti ahcun aa dawh tukmi theipar tha kan chuah khawh ve te ko lai. Fakpi in thlacam ibawm hna usih. Chin Foundation nihhin hngakchia caah riantuan ding timhlamhnak tampi a ngei. Thla kan campi ko u. Kan chungkhar cio le kan miphun caah bochan tlakmi mino kan sersiam khawh te ko hna lai.

Phaisa ngeimi chungkhar tampi nih cun an fale kakip ah an kalpi hna. Kings Island, Disney World le kakip an chim ko men lai. An fale caah phaisa tampi an dih. Asinain Life AcadeMe ahcun phaisa tampi kan dih lo nain thiltha lawngte kan cawng. Nghakchia caah theih ding le thiam ding a herhmi lawngte kan cawn pinah an nunnak ca dingah a herhmi Pathian Biatak zong kan chimh hna. Thiam ding le theih ding le hmuh ding thil hi an tam ngaingai. Kan zoh cawk in kan kawl cawk hlei hnga lo, cu caah nunnak caah a herh hrimhrim mi le a biapi taktak mi ithim khawh tu hi a biapi deuh mi asi. Tutan summer school ah fale a rak thlahmi nih nan thimmi hi nan fale caah thil man sung ngaingai asi ko ti ruat in cawnpiaktu lei zong nih biatak tein kan izuam ve. Hakkau deuh in tamtuk kan chimh sual hna lai I sianginn lai an huam ti sual lai lo, ti hna kan phang lei. Cu caah akarlak in kan cawnpiak hna. A dongh tik ahcun an hlawkmi nan hmuh khawh te ko lai, tiah ruahchannak kan ngei ko.

A zulh awk asimi lam kha hngakchia cu cawnpiak law, a upat tikah mah cucu a pial tak ti lai lo (Phungthlukbia 22:6). Biatak kha vaa cawk law zuar ti hlah. Fimnak, cawnpiaknak le hngalhthiamnak kha icawk hna (Phungthlukbia 23:23).

><><><><><><><><>

LA Bulletin 3
(Summer School 2016 lio chuahmi asi)
June 30, 2016

Nule Pa hna,

Kan sianginn kai cu zarhthum kan dih manh cang I zarh khat lawng a tang cang. July zarhkhatnak kan khar sual ahcun zarh hnihnak (July 14) tiang kan kai te hnga tiah rak timi kha peh in kai ko usihlaw tuanah ilim ko usih, khar chung ning rumro cachimh cu tiah peh kan timh hi asi. Hmaizarh cu nikhua a that ahcun cawn ninga tiang kan kai men lai, field trip zong kalpi kan duh pah hna. Amah belte phaisa dihnak lawngte khi asi. Nule Pa nih le tlawm deuh thawh duh asi fawn caah kan ifiang rih lo.

Bus monghpah in kan fale he bia iruah pah cu a nuam ngaingai. A kan lem deng ko rua ka ti. Laitlang an um lio he cun an idang ngaingai ko, an khuaruah ning le thil an hmuh ning ah an thang ngaingai ti fiang tein hmuh khawh asi. Khatlei kamah ruah chih dingmi cu mah tluk in thil a cawng khomi hna le a thluak a cakmi hna hi an cawn khawh ning zulh in kan bawm kho sual hna lai lo, tihi asi. Nule Pa cheu khat cu kha lio caan te ahkhan heh tiah an bawmh hna caah thil tampi an thiamter khawh hna. Vulei cung minthang hi an kum a no chin lengmang, hlan lio I kum 30 nih an tuah khawhmi kha atu ahcun kum 20 nih an tuah khawh dih cang, lekzuamnak te hna zongah kum 20 an tlin hlanah vulei cung minthang ah an chuak thluahmah ko cang.

Vulei cungah mino cathiam cem an timi nu te cu India ram ummi Sushma Verma hi asi. Kum 7 asi lio a thirual pawl a karh le phawt an cawn lioah tanghra a awng cang, kum 13 asi I a thi pawl high school kai an itimh lioah M.A. a awng manh. Kum 15 asiah BBA University ah Ph.D. kai dingin luhnak a awn caah vulei cung PhD kaimi lakah hngakchia cem asi. Verma hi amah lawng cathiam asi lo a u pa Shailendra zong hi kum 14 asiah computer lei cawnnak degree a rak hmu vemi asi. Verma hi sibawi kai a duh nain kum 17 a tlin rih lo caah kainak nawl an pe duh lo. Taang sang kai ka duh tikah ka kum nih hna a ka hnawh lengmang mi hi a poi tuk ee, tiah The Times of India nih interview an tuahmi ah a chim. Hihna unau kong zoh tikah an nule an pa nih a herh ningin an bawmh khawh hna lo ahcun hi tiang si khawh ding hi asi kho lomi asi ti a lang. Cathiam mi tampi cu sianghleirun pawl nih anmah sianginn ah kai ding in heh tiah an sawm hna, an sianginn kainak dihmi vialte zong an bawmh hna pinah ramkip zong an tlawnpi theu hna. Cu caah kan fale caah kan lioheu mi hi a let tampi in a karh kho dingmi sipuazi tuahnak in a hlawk deuh ee, tiah GTI principal Dr. Tluang Za Thang (PhD in Engineering) nih Chin Foundation tuahmi Hakha workshop ah a chim.

Japan pawl hi mi taima taktak an si. Nule pa lawng teimak an icawnpiak lo, an fale vialte hi idin thiam lo in an cawnter ve hna. Cu caah ramdang I kum tlawmpal khua a va sa tami pawl an ram an kir than tikah an fale nih sianginn pehthan an iharh tuk ee, tiah Japan culture kong cawnnak cauk nih a tial. US ah miphun then in zoh tikah Asian pawl hi cathiam tam cem le hlawh tam cem a hmumi kan si. Cu pinah Asian pawl hi Math (Kanaan) a thiam cem pawl kan si than. Mirang tampi hi Kanaan ah an niam tuk ee, ti asi. Cu caah Kanaan te hna anmah nakin tampi thiam chin lengmang ahcun Engineering si duh lawng cu chim lo Engineering chimtu saza professor sinak dingah kan fale caah lam tampi a um tinak asi. Kanaan thiam lo ahcun science thiam khawh asi lo, science thiam lo ahcun technology kan ti lengmang mi thiam sang si khawh ding asi lo. Cu caah kan fale cu Kanaan tampi kan chimh peng hna.

A biapi mi cu lung dong lo te le pehzulh te in izuam peng hi asi. Laimi kan poi tawnnak cu kan lung dongh a fawi tuk tawn mihi asi. Kan fale an cawn khawh lioah tampi in bawm hna usih, pehzulh tein bawm hna usih, thihruai hna usih, thlacampiak hna usihlaw nikhat khat cu US kan phanhmi hi suallam ngei taktak asi ko, tiah kan fale nih chim hau lo in an langhter te ko lai. Mi thluachuak hna chung ti zong ton khawh cio asi, US tliklzuamnak asimi thiamsang zuamnak ah kan fale tlikter ve hna usih, cuticun kan chungkhar he kan miphun he thanchonak lam kan panh kho lai.

Filed in: About The CF

Get Updates

Share This Post

Recent Posts

© 2017 The Chin Foundation. All rights reserved.